يفتح الله

رايحة فين
ما تقولى لى
شاورى حتى
طمنينى
............
كل واحد
جاى ياخدك ف اتجاه
كله فاكر انتى ملكه
كله بيفكر ف جاه
أه ه ه ........
يا صبية.. يا بهية
يا أبية...
يا حبيبتى يا أصيلة
عندى أكتر من وسيلة
تثبت العشق الحلال
حتى وانتى بعيدة عنى
برضه عاشق
برضه ناوى ع الوصال
....................
علموكى الخوف
فا خوفتى ولا ّ أيه
ما تقولى لهم
كله رايح منه ليه
..........
ليه كده واقفة سكوت
ليه دا انا لاجلك باموت
...........
ما تقولى لهم
اللى جاى طمعان ف جاه
ضحى طيب يوم عشانك
عمره كان مشتاق حنانك
اللى فجأة
شاف ف نفسه أنه فارس
اللى عامل أنه حارس
ما تقولى له كنت فين
كلهم ف الزفة كانوا كدابين
كلهم ف العز كانوا
فجأة بانوا مظلومين
لأ وأيه
بيحللوا الوضع اللى راهن
طب تراهن
كله قاصد مصلحة
اللى ناوى مرجحة
اللى عايز رحرحة
واللى جاى
يختم حياته بمريسة
اللى جاى ياخد بتاره
واللى من كتر انكساره
قال دى فرصة
حتى لو تقلب بجرسة
برضه حاجة كويسة
.......
ما تقولى لهم يفتح الله
اللى مش خايف عليّا
اللى مش شايف ولادى
يفتح الله
أيوه بالفم العريض
قولى ليهم
يفتح الله
واحنا جنبك هتلاقينا
نخدمك برموش عينينا
ترجعى تانى لمكانك
فى الصفوف
ترجعى دايما عروسة
واحنا هندق الدفوف