الحَرَجة

انا مغرِّب
وطالع بكرة ع الحَرَجة(1)
حااروح الزرع واتمردغ
على الدرابيس(2)
وأتغدّى بعيش قيضى(3)
وجبن اخضر
وجِدْع سرِيس(4)
وانسى هدّة امبارح
وأركب نخلنا الطارح
وأجنى الطايبة والمِقْرَش(5)
وأرمى الصِِيِص(6)
حااقوم من نومى فجّارى
واترك فرشتى ودارى
وأهرب م البلد والناس
وأهجر قلمى والكراس
وتعب اليوم
وأقلع توبى ومداسى
وأسند ع الخدِيم(7) راسى
واروح فى النوم
والملم م البيوت عمرى
وأعزف ضحكتى ع الناى
والحِّن غنوة القِمْرى(
وادارى عن غنايا بُكاى
وحين يعوى فى قلبى الخوف
اروح واقعد مع جهلان(9)
ونتسلَّى بحكاوى زمان
وسيرة عمرنا اللى فات
وآخد وِش بالمحرات
واهِتْ(10) على البقر يرمح
وأنده ع الشجر يطرح
وأتصاحب على القردان
واقوم واقلع بسروالى(11)
وأفرش ع العزِيق(12) شالى
وساعة الدنيا ماتقيّل
ضِلال السُنط(13) يحلالى
***
انا رايح خلاص بدرى
حاافرِّغ كل ما ف صدرى
وارمى الهم فى المروة(14)
وتعب البال
وشوم الحال
وقلنا وقال
وانسى خنقة الشارع
واصرِّخ فى الخلا الواسع
بعزم الصوت
واكوِّع تحت شجرة توت
لاتمنعنى حيطان ولا باب
وأفرد باعى للطيّاب(15)
واشوف البت نوّارة
وادندن ليها كام موال
وهى تشوفنى تدارى
وتتلتّم(16) بطرف الشال
***
انا ماشى وادينى نويت
كرهت الزيطة والدوشة
كرهت البيت
كرهت سريرى والفَرشَة
وحيطان الزيت
وحشنى رقادى فى العشّة
وبراح الغيط
انا رايح....
كرهت الحزن ودموعه
وعض الجوع ومر الزاد
كرهت الفرْح وخضوعه
كرهت بلاهة الأعياد
حااروح الحرجة واتمطّع
وأرمح رمحة غجريّة
وأصرخ صرخة همجيّة
وحالف للديار ماارجع
واخلّى العيشة بدائيّة!!
****
بقالى كام سنة بااضحك
وضحكتى صفرا دحلابة
بقالى كام سنة باافرح
وفرحتى فجّة قلابة
بقالى كام سنة باازرع
وزرعتى ضلة كدّابة
بقالى قد كيف مشتاق
اقول القولة بعبلها
ومن غير خوف
تشوفها الخلق تقبلها
وترمح فى النجوع وتطوف
بقالى قد كيف ملهوف
اشوف الحرجة وحبَلها
بمدد الشوف
بقالى قد كيف ماعرفت
ناس معجونة بطيابة
كرهتك يازمن فرّاق
ياقول حرّاق
ونور سرّاق
ياويل نعجة بلون برّاق
تصدّق ندهة الغابة
****
وقمت من الصباح غربت
وتهت هناك!!!
وضعت هناك!!!
فضلت أبُص وأدوِّر
على الحرجة ولالقيتهاش!!
لقيتها بيوت وشوارع
وبنى آدمين
لقيتها حوارى مسكونة
بناس تانيين!!
قعدت ألّف وأدعدس(17)
وازعِّق واسأل الفايتين
قالولى خلاص!!
لاعاد فيها خلا واسع
ولاساقية ولامحرات
لاباقى غلة ولاضلّة
ولاعِشّة تدارينى..وجِدْع نبات!!
لاباقى قِمْرى ولاقردان
ولانوارة ولاجهلان
***
وزى ماجيت
رجعت البيت
رجعت لخنقتى تانى
وحيطان الزيت!!!

الشاعر الواعر الاستاذ

عادل صابر

تخيلتك مع حرفك وانت تعدو بين الزرع فى ارضك

وتكتب تلك القصيده . واجمل ما وصفته على مدار

اليوم الكامل فى حياة رجل ارتبط بأرضه .

هى تلك الخصوصيات الدقيقه والوصف الرائع لادق

المسميات بالهجه الجنوبيه الرائعه .

امسكت بحر الهزج بمهاره طوال النص إلا من قليل

احييك على براعتك وفنياتك النادره .

مودتى ايها الرائع ..