مين يعـــرف حبـيـبـــتى

لو تسمعوا منى الحكاية كلها
هتصدقونى لما أقول بحبها
حالة مابين العشق أو مس الجنون
ولا فيها لمسة إيد ولا نظرة عيون
ولا حتى أجمل حاجة وكتير شكلها

*********************************

لكنها بتحبنى من غير حساب
وقلبها صافى وأبيض م السحاب
لو يوم غضبت بلف وارجع عندها

*********************************

بتشيلنى فى عنيها وأنا حالى عدم
وانا قلبى متفرهد ومعصور م الألم
بتضمنى وأنا جريح فى حضنها

*********************************

بحبها وبتحبنى من غير كلام
بلاقيها آخر الليل مع تراب الزحام
صفصافة ع الترعة بتغسل شعرها

*********************************

حبيبتى بالعربى وبالمعنى الفصيح
ساكنة على السكة وفى بيوت الصفيح
زى الأميرة لما يسقط عرشها

*********************************

تايهة مابين الذل والأصل المجيد
بعد الشرف والعز بتدوق الحضيض
لكنها أبدا ماباعت عرضها

*********************************

بحبها من غير شعارات أو خطب
بحبها لو حتى بياعة حطب
بحبها من قلبى واعشق أهلها

*********************************

ومهرها من دمى لازم هدفعه
وفجرها لو ياخدوا عمرى هرفعه
دى عيون حبيبتى أى شىء يرخص لها

*********************************

وصبح صباحك فل ونهارك سعيد
وبقيتى حرة وانا ف حجرك شهيد
ياهل ترى وفـِّيت بوعدى ف حبها؟

*********************************
شعر / طلعت الحداد