الثورة تقول (كابتشينو)

كابتشينو وعيش فينو

وبيض مسلوق وتورتاية

وقعدة حظ مرصوصة

تعالوا وإسهروا معايا

نداوى الهم بالشيشة

وبسجارة وتحشيشة

نطفى بيها حرقتنا

وننسى سُلطة حرقتنا

ووجه كئيب بيحكمنا

ويقهرنا ويظلمنا

ويقتل وِلدنا الفالح

يِعَلي المؤذى والطالح

ويتحكم ف رقابينا

خلاص الظلم فاض بينا

كفاية حكم ...بزيادة

كفاية تفترى فينا

كابوس الخوف رحل عنا

وظلمك مش بيثنينا

قنابل حزن جوانا

وعِندك لو يفجرها

حياه أمنة هتخسرها

وتخسر حتى أولادك

وزى ماإبنى مات وإنداس

يا عبد يافاقد الإحساس

جموع ح تدوس على رقبتك

كفاية عيب على شيبتك

تَنَحى وإختم القصة

تداوى الحزن والغصة

وقول قاتل أكيد همشى

دماكم لطخت وشى

وترحل فى سلام

سافر

وجيبها قوام من الآخر

مفيش تحشيش

خلاص فوقنا

وعزة مصرنا فوقنا

ودم ولادنا ف إيدينا

بيلهمنا ويحيينا

ويدفعنا كمان قدام

ونحلف جنبنا ما ينام

ولاترتاح لنا جتة

مادام وجهك بيحكمنا

وماسك فينا ومتبت

بذور الغل ح تنبت

خلاص إرحل كَفانا جراح

خلاص إرحل بعيد وإرتاح

وريح كلنا منك

لوانى كبيرة وف سنك

لكنت إرتحت من بدرى

وآه م الغل لو تدرى

ولو تعقلها وتقدر

أكيد تقدر هتحسبها

وتعفى بلدنا وتسيبها

وتعفينا من الإحراج

ويدخل حقدنا الأدراج

ونخنق جرحنا فينا

خلاص إرحل ويكفينا

لو نطلب دما ولادنا

بحور دمك ماتروينا

منى سليمان