حسبى الله ونعم الوكيل

حسبى الله ونعم الوكيل
==============


فى اللى ولع دى الشرارة ******** واللى دمر فى الحضارة
واللى بعد الامن خـــــــلا ******** مصر تشعر بالمــرارة

واللى اوحى ليك وليــــا ******** بالمظــاهرة وبلاذيــة
واللى لسة بيدى فرصة ******** لانتشـــار البلطجيـــة

واللى غامر باقتصــادى ******** واستخف بقوت ولادى
كان سعيد والخلق طالعة ******** نار بترعى ف كل وادى

والشعوب قاعدة تراقبنى ******** بعد ما الاعصار ضربنى
جرحونى بسهم طايش ******** من ايدين ابنك وابنى

سهم خلا الضهر محنى ******** اصله كان مسنون دبحنى
حسبــــــى الله المهيمن ******** فى اللى عرانى وفضحنى

واللى حول مصر غابه ******** وكر سيئ للديابـــــــة
بالموبــايلات اللعيــــنة ******** حولو مصــر لخــرابة

مين يقول ان اقتصادنا ******** يبقى لعبة فى ايد ولادنا
حد يا اخواننا يجاوبنى ******** هما لية كـــارهين بلدنـا

هما لية راكبين دماغهم ******** والشيطان شاغل فراغهم
والغباء سيطر عليهــم ******** والغرور حجمة بلغهــم

الف حسرة والف لعنـة ******** ع اللى باع مجد الفراعنة
واللى قلل من قيمتنـــا ******** واللــى غير من طباعنــا

واللى خلا الفجــر طالع ******** يبكى دم على المصــانع
والحدود تصــرخ وتنده ******** ع الجنود جوا الشوارع

مين يعيد الامـــن تـانى ******** بعــد ما اتهد ف ثوانى
والبلاد تتساق وتصبح ******** تحت رحمة جيل انانى

جيل خربها ف يوم وليلة ******** جيل عايزها تكون ذليلة
جيل بيرســـم بالــموبايل ******** للضـــلال احـــلام هبيلة

جيل وراه مجهول يسوقه ******** فرغ الســم ف عروقه
شل عقله لجــل ينســـــى ******** إن رب العـــرش فوقه



شعر :
صلاح فتح الباب
فبراير 2011
[right]

الاستاذ الشاعر

صلاح فتح الباب

استغلت اقطاب الحزب الوطنى كما اعترف بعض المقبوض

عليهم تلك الثوره ودفعوا بعناصر التخريب الى الساحه لكى يضغطوا

على الشباب بالإنسحاب . وهذا ما فشلوا فيه . وسوف يحاسبون .

اشكرك على جمال حرفك .

مودتى وتحيتى ...

بس ياريت نقدر نحافظ على اللى فاضل

و كفايه خراب

علشان

فى كل الحالات

مصر واحنا اللى ح ندفع التمن

مش حد تانى

الحقيقه اعود واشكرك كل الشكر

على قصيدتك الاكثر من رائعه والملمه بحقيقة الامور وليس جوانبها

دمت بكل روعه