أنت أيه

عام ورا عام ورا عام
سنة بتجر ف سنة
ليل وزحام وألام
وانت بتحبى هنا
لا عرفت أخر الكلام
ولا شفت أيه المسألة
عايش كما أنك
ما عشتش يوم
لا عرفت معنى القمر
ولا شفت مرة النجوم
وسنينك عمالة تجرى
ولا تهديش
لا عشت يوم ع الرصيف
ولا حتى يوم
ع الريش
مبسوط بأنك
بين البينين موجود
لكن يبدو كما أنك
مالكش وجود
لا عرفت يوم
ازاى تحب
وتحب مين
لا وقفت مرة
جوة طابور المظلومين
أو حتى ويّا الظالمين
عايش حياتك
جنب ضل الحيطة ماشى
وقطر عمرك
ماشى بيك بسرعة ماشى
يعنى عايش ف الحياة
من غير هدف
تمشى .. تمشى
تقف.. تقف
من غير ما تسأل
فين وليه
من غير ما تعرف
انت أيه
أنت ايه يا ابنى
..... صنم