العار

موضوع: العار الأربعاء سبتمبر 01, 2010 10:40 pm

العـــــــــــــــــــــــــار

( لقد آذيتني كثيرآ00 إن كنت تبحث عن المغفره فتحدث مع الله وليس معي )

عار مكوم ع الرفوف

ندل بيهادي الضيوف

الجمل لو جاع بيصبر

الحمل لو جاع 0000 خروف

وإنت مهما تداري خايف

مننا بس الظروف

خلت الكون زمبليطه

والوطن مش ع الخريطه

خلت إللي عنده عله

يمتلك كل الأدله

كأنهم مسكولنا ذله

قوموا ياولاد العبيطه

إعلنوا الكلمه المفيده

إقفلوا باب المذله

وإفتحوا مصر الجديده

00000000

أشك إن الوطن جايبكوا من صلبو

وأظن بردو الوطن شايلكوا من غلبو

ولا كلب يوم إن نبح

ينبح ف ديل كلبو

م تعضوا ودن الوطن

خلي الحساب يجمع

هو عديم التنا

إيه فايده لو يسمع ؟

00000000

ياجدول الضرب

ضربك غبي وفصيح

لما احنا مش ف00 الحرب

مالي البلد سلاليح ؟

عشان ولاد الكلب

عمالك الفلاليح ؟؟

تقسم الواحد وتكسر

يطلع الواحد 00 صحيح

00000000

ياساكن البرج

برجك إزاز مع عاج

مسيره يوم ينكسر

ياما إنكسر أبراج

ساعتها مين يرحمك

يا حلو 00 م الجعانين ؟؟

لا هولاكو يسأل فيك

ولا صلاح الدين

لا الأهرمات تسترك

ولا حيطان عابدين

ولا أوضه من زجزاج

لا جيش ولا مركزي

ولا فصوص التاج

ولا الخدم والحشم

ولا خادم الحرمين

ساعة الحساب قربت

لا عمو ولا خالو

لا عنتره الشداد

لا زيده بهلالو

لا السيده تنفعه

لا إبن يبقالو

لا أي شئ ف الكون

حايدنو علي حالو

حتي الملوك تنوزن 00 كلن بأعمالو

وإنت عمايلك فشر 00 فرعون بأحوالو

فرعون دا مين يا جدع

فرعون دا جنبك إيه ؟؟

وانت إللي ف00 المبتدا

واحد 00 مالهش شبيه

لا تسعميت فرعون

إنت حشيش الملا

إنت إاللي جايب جون

لا في حواجبه نتف

ولا صبغه نفس اللون

ولا كان بيحكم بشر

بالنص والكربون

تيجي الأوامر لسيده

بالشفره ع 00 الفودافون

الطبع فينا إنطبع

طبع 00 مع مطابعين

إربط حمار البلد

مطرح ما قال صاحبو

هو إللي ساحبو بطل

واحنا 00 هنا مرابعين

00000000

فرعون دا مين يا جدع

فرعون دا أصله غريب

لا كان بيلعب تنس

ولا لهش ف التحطيب

لاكان مقاول بشر

سلمنا ع التشطيب

ولا كانش تاجر بقر

لاكان مسجل خطر

ولا كان بيقرا الغيب

هوا إلليمكتوب لنا

عاوزينو يتوضا ؟؟

أهي سنين القرف

لزمن هاتنقضا

كان إفتكر ربنا

ولا إتعظ بالشيب 00؟؟

ولا إن طحن أو عجن

بكلام مع الطرشان

كان خاف من الديان

ولا إختشي م العيب 00؟؟

حواليه عيال مدرسه

ف الزينه والمحلسه

والطب والهندسه

ليهم فصول ودروس

قاعدين وف المندره

بيقولوا 00 ع المسطره

مين إللي جابك ورا 00؟؟

بالفهم والمحسوس

ساقوا بشريعه الغاب

وطبيعة الهكسوس

شالوا لواء الشرف

عاشوا 00 وماتوا لصوص

00000000

يازارع الصبر

عندك تبيع منه 00؟؟

عندي كتير يا عم

بصرف ع العيال منه

إن كنت عايز صبر

إزرع ولا تخبيش

وإن طال عليك الأذي

إحرن ولا تمشيش

وموت مفنجل عينيك

علي قد جهدك 00 عيش

موضوع: رد: العار الأربعاء سبتمبر 01, 2010 10:48 pm

أول مرور ليا ع العار اللي صاب الكل
خليتنا قدام مرايتنا نشوف الذل
بالله عليك ترحم و تلم في لسانك
عايزين نعيش وخلاص لو بعنا ورد وفل

موضوع: رد: العار الأربعاء سبتمبر 01, 2010 10:55 pm

الكبيييييييييييييييييييييييييير

المهندس عطية بك شواش

طبعا استاذ كالعادة

ورئيس قسم العمليات الكبرى

للشعر السياسى

تحياتى ياقاسى

موضوع: رد: العار الأربعاء سبتمبر 01, 2010 11:00 pm

بواسطت ثبتت لجمال الشعر والشاعر

وطوله

موضوع: رد: العار الأربعاء سبتمبر 01, 2010 11:04 pm

ياسيدى ليه تفوقنا

ماتخلينا فاصلين

قال يعنى لاقين قوتنا

رايحين على فلسطين

استاذى القدير ما اروعك

وما اجمل كلماتك

شكرا صاحب المدرسه الخاصه

القدير مهندس عطيه شواش

دمت بحب

موضوع: رد: العار الأربعاء سبتمبر 01, 2010 11:05 pm

الشاعر الرائع المميز

م /عطيه شواش

قصيده كتبت بأحرف ناريه

قذفت لهيبها فى قلوبنا

فزادتها اشتعالا

اشكرك على هذا المضمون المميز

الذى ينزف حبا للوطن

سلمت يداك

موضوع: رد: العار الأربعاء سبتمبر 01, 2010 11:08 pm

إن كنت عايز بصل
خدلك راسين وامشي
وان كنت عايز عسل
خد بلّاصين رمشي
حلمك كبير يا بطل
فياريت متحلمشي
إن كنت عايز وطن
نام يلّا متقومشي

موضوع: رد: العار الخميس سبتمبر 02, 2010 12:11 am

فضفض وقول يا كبير
دا سكاتنا باعنا بلاش

من عاش سنينه هوان
لا كإنه ولا يوم عاش

واللى يخاف م العلل
ما يفارق الانعاش

قول واحكي ع المهزلة
يا عم يا شوّاش

فصّل هدوم الوطن
بمازروة الفهمان

واركن مقص الألق
وخيوط هاريها زمان

يمكن يليق ع الوطن
توبه اللى من ايدك

وساعة القبح فينا
تبطل الدوران

وطنك غريق يا جدع
والاسم عبارة

و "يريد أن ينقض"
وكنيته عمارة

ولّع بنا وماشيين
في القطر بنهلل

على جون يهز الشباك
لاجله تقوم غارة

باركو. لنا ع الغاز
رح نشتريه تاني

خلاص مفيش ألغاز
ولا ضلمة من تاني

باركو لنا ع الســد
هما الى رح يبنوه

واللى حيعطش هتوه
يشرب من احزاني

أنا آية ف "الرمسنة"
وبحب كل "جمال"

واشكر ف "عز" البلا
"وعزمى " هـد جبال

وعندي 6 احصنه
وقت اللزوم خيال

واسمع واطيع بالقوى
لو قالوا صوم شوَّال

عاطف عاشور

موضوع: رد: العار الخميس سبتمبر 02, 2010 5:43 am

يابوي عليك ياجدع

قطعت قلب الخلق

حطيت قوي ع الوجع

دا غير مرار الحلق

يالصبر فينا أتكن

قلب الحجر بيئن

امتى علينا يحن

ونشوف لبُعدُه طلق
.....................
استاذي باشمهتدس الكلمات

تحياتي وتقديري لشخصك الكريم

كل عام , شهر, يوم , وانت كدة

متكن , رائع استاذ , كبيييييييييييييييييييييييييير

يارب بسر دعانا تقبل رجانا و نمحي العار

موضوع: رد: العار الخميس سبتمبر 02, 2010 4:14 pm

وصلنا للكبير والالغاز والفوازير
ونجيب منين كلام
يقدر المقادير
طيب
نسلم عليك اول والقلوب مسلمه بامر الله والرسول صاحي ان شالله
*****

ولا حوله لينا صبح فيكي ولاقوه
نشبه كلاب الكرام ماعندها مروه
****
انت جميل بكل المعاني يااستاذنا

موضوع: رد: العار الخميس سبتمبر 02, 2010 7:05 pm

ما هو لازم نعيشها بشرعهم

وننام ..ونصحى بأمرهم

نستنى .. لحظه عطفهم

وسعاده .. البيه الكبير

لامم فى ضله .. كام وزير

على كام برنجى .. وكام غفير

وان قلنا ليه؟؟ يعلى النفير

بالشوم .. وقول فين يوجعك

واصرخ .. ومين راح يسمعك

مش كان سكوتك .. ينفعك

ما خلاص بقى .. ماعدش بيفيد الكلام

نرفع ايدينا .. بالسلام

وان قالوا صح .. نقول تمام

تمام .. تمام

-------------

خلاص يا استاذى اعتادنا الأستسلام

وقالو لفرعون مين فرعنك ؟؟؟؟؟؟؟؟؟
Mad

موضوع: رد: العار الخميس سبتمبر 02, 2010 7:35 pm

الحبيب الشاعر الكبير

مهندس / عطيه شواش

صدقنى كل الخوف من ثوره .

وثورة الجياع سوف تقضى على الأخضر واليابس

وياريت كلامك وصل

ولا سدّوا ودن بطين

ولاعمرهم يحموه

لو كان أسود حطين

اعظم لحرفك وأنحنى إجلالاّ وإحتراماّ

لروعة ما خطت يداك .

تحياتى وخالص تقديرى ...

موضوع: رد: العار الجمعة سبتمبر 03, 2010 8:25 pm

حبيبتي دعاء00

أشكرك علي المجامله الرقيقه

وسلامه قلبك (ألأبيض ) من الوجع

موضوع: رد: العار الجمعة سبتمبر 03, 2010 9:04 pm

الشاعر الكبير عطية شواش
بجد الله عليك
دمت ودام ابداعك
تيمو

موضوع: رد: العار السبت سبتمبر 04, 2010 1:43 pm

بابا حبيبي حضرتك عارف إني مش بجامل في الشعر
ولو جاملت فأكيد مش هجامل حضرتك
بجد أنت شاعر الوطن
دمت ودامت لنا كلماتك

موضوع: رد: العار السبت سبتمبر 04, 2010 7:41 pm

أخي العزيز د / صلاح

حبيبي دمت سنين

ثبت كمان وكمان

عليك كتابة الأدب

وعلي ليك دخان

موضوع: رد: العار السبت سبتمبر 04, 2010 10:41 pm

[b]

مستنى ايه ترد عليا

وبقالى كتير مستنيه

يا هلترا مشغول جدا

ولا دا تقل شرقويه[

/b]

موضوع: رد: العار الأحد سبتمبر 05, 2010 2:05 pm

ياعم مينا اصحا يااخينا
ياموحد *** القطرين
قوم ضم حيفا علي سينا
لاتقلي غزه ولافلسطين

هات تل بيبا علي مارينا
وهات عالينا علي واطينا
واللي يعارض ملعون وشاين
نفرق معاكم ملعون ابينا

من حلو طبعك طبعني اطيعك
من مركاسك سكران وطينه
مهمزني احبك ولايوم ابيعك
اطول مسله سلللها لينا

استاذنا عطيه شواش

مواااااااااه بعد الفطار هل يجوز؟

موضوع: رد: العار الأحد سبتمبر 05, 2010 3:29 pm

رائع ما خطه قلمك المتميز جدا
دمت بكل الخير والابداع حليفا لك
دمت بخير

موضوع: رد: العار الأحد سبتمبر 05, 2010 5:49 pm

عزيزتي /كليوباترا الثغر عزه الزرقاني

أحيانا كثيره أصاب بالإكتئاب من البشر

وأتأملهم وأقول : إيه كل الهدوم

إللي ماشيه دي من غير دماغ

وهل فيه أمل إن العالم ده يتحرك ؟؟

إزاي وفين وإمتي ؟؟؟

فأكتئب وأبقي مش عايز أكلم حد خالص

وأقعد في البيت وأحرن زي العيل الصغير

لاكن والله ضحكتيني 0000 ربنايسامحك

فتافيت حاجات

وحاجات علي أخر الزمن فتافيت00

قطر المسا فرغ ع الرصيف هلافيت

خمسين سنه باجري أنا

ع الأرض لما حفيت

لا مشيت في ضله

ولا لحظه في حضن دفيت

فتافيت حاجات

وحاجات علي أخر الزمن000

فتـــــــــــــــــــافيت

سعدت مساءآ سمراء المنتدي

موضوع: رد: العار الإثنين سبتمبر 06, 2010 11:47 am

ما تصلي كدا عالنبي ياعم ياشواش
ماعاد لعنتر قضيه وعبله باعها بلاش
باع القبيله بفسيله وناسب الاوباش
كان مهرها دمنا بادلونا غاز بالشاش

ابقي رد بقي ع العيد الكبير
هههههههههه

كل سنه وانت طيب وبخير انت وكل اهلك وناسك

موضوع: رد: العار الإثنين سبتمبر 06, 2010 6:57 pm

حبيبي /طاهرالصوفاني

بلاش كده 00 دا إحنا حبايب من أيام الجيزه

فضحتني إنت وعزه الزرقاني

والله أنا باجي أرد ألاقي عشرين قصيده نزلت

فأنشغل بالرد عليهم وأنسي أرد علي

حبايبي وبعدين ماخبيش عليك أصل أنا

مسموحلي بساعه بس علي النت كل يومين

( أصل النت بإسم مراتي ) ,انت عارف تحكم الحريم

أكيد مجربه وأنا من النوع إللي ماشي علي الحكمه

إللي بتقول : إن جالك الغصب إعمله رضي

عشان نعرف نعيش الله لايسيئك

علي العموم شكرآ علي سؤالك عني

وكل سنه وإنت طيب

كده ياعم الحاج أهو اليومين خلصوا00 باي باي

موضوع: رد: العار الإثنين سبتمبر 06, 2010 7:47 pm

سندريلا المنتدي /اميره البدري

شكرآ لحضورك الدائم

وتعليقاتك المحترمه

عايشين في بطن الألم ومعاناليل الشقا

إمتي النهار نعرفه إمتي حيطلع بقا؟؟؟

ياخوفي لو يوم طلع يبقا الشروق باهت

ويجيبوا للي إشتكي كام تهمه متلفقه

تحياتي

موضوع: رد: العار الإثنين سبتمبر 06, 2010 10:30 pm

عزيزتي الشاعره المبدعه / فاطمه حمزه

طب ليه نعيشها بشرعهم؟؟

هواحنا مش ناس زيهم ؟؟

علي أقله نقدر نتحد

ونحط إيدنا ف عبهم

نطلع العيش والغموس

نطلع الزيت والفلوس

نطلع الدين من أمهم

ولا إحنا ناس مش زيهم ؟؟؟؟؟

موضوع: رد: العار الثلاثاء سبتمبر 07, 2010 8:12 pm

ولا يهمك سعادة البيه

ترد علينا ما تردش

فاهمينك كدا وشاهدين

وعارفين اللى عندك ايه