مش نبى

شالت صورتها اللي بقالها عشر سنين

على مكتبي

و قالت : خلاص

مات الهوى

و أنا جايه اعزّي حضرتك

مبروك عليك

و تقول : يا شاعر

بس مش شاعر بناري و لهفتي

فكّرت فيّ

و الدموع نازلة تسابق حسرتي ؟

و أنا يا اللي من بين الخلايق كلها

قلبي اصطفاك

خلاك نبي

اكمني عارفة إن الهوى

لما بيبعت أنبيا

يبقى النبي مبعوت لواحد

م البشر

و نبوتك ليّ أنا

لما دعيتني جريت عليك

و أمنت بالعشق اللي سطّر طلعتك

على نن عيني و قال لروحي

: قربي

قربت لك

و قرينا ف كتاب الوفا

عهد الغرام

و عشر سنين

و أنا جوا محرابك

باطوف

لابسة هدوم الرهبنة

ما تعبت يوم

ولا ثانية صاحبني الملل

و لا خفت بإيديك ينجرح قلبي الصبي

اعذرني لو قلبي اللي آمن

شك فيك

و شيطاني وسواسه ابتدى

ينصحني إني اكفر بآيات الغرام

ما أنا شايفة غيري قرّبت

تسمع ترانيمك بشوق

و بدال ما تسكت لجل تمشي

جلجلت ألحان هواك

كسّرت فيّ كل إحساس بالأمان

بالإيمان

باللي كان

و نديت عليها و سيبتني

وسط الطوفان

اللي ف ثواني جه يغرّق مركبي

اعذرني

ما أنا قلبي الغبي

صدّق بإن مسيلمة

ممكن يصون عهد الوفا

لو قلبه داق طعم الهوى

ويكون نبي

صدقني و حياة الليالي اللي قضيتها

ف جنّتك

أنا عقلي من أول دقيقة

دخلت فيها دنيتك

قال لي ابعدي

كدّبت عقلي

و عشت ف الوهم الجميل

و أما انتبهت عرفت إنك

مش نبي

الرائع جابر الزهيرى
ما اجمل تعبيراتك و احكامك للنص
تناولك للفكره تجلت فيه حرفة جابر الزهيرى الشاعر فتراقصت الكلمات ليبدو النص غنائيه مقصده او قصيده تغنى مفعمة بحس شاعر متمكن

تحياتى ايها الشاعر

كلمات لا تخرج الا من شاعر
وان شئت فقل من جابر

الشاعر الأستاذ رأفت المصرى :

أشكرك على المرور الأول الذى شرفت به القصيدة وعلى كلماتك الرائعة التى أسعدتنى جداً

دام تواصلنا

جابر الزهيرى

الأخ الفاضل والمبدع الكبير عادل سند :

مش عارف أرد أقول إيه

الكلام الجميل اللى سمعته منكم ومن عمى جابر سلطان وعمى فوزى الشربينى لما شرفنا

بزيارتكم فى الإسكندرية وفى الندوة المصغرة على القهوة بعد كرم الضيافة اللامتناهى الذى

غمرتمونا به ألقيت عليكم هذه القصيدة وفرحتى الكبيرة بإعجابكم بها تذكرتها الأن بهذا المرور

العطر الذى تعودته من أخ فاضل وشاعر كبير أتفاخر أننى أخوه وابنه وصديقه وتلميذه

وإن شاء الله قريب تجربة جديدة وأسلوب جديد سأساهم به أتمنى أن ينال إعجابكم

قصيدة اسمها الـــ ...

ههههههههههه

أخوك جابر الزهيرى

الشاعرة المتميزة والأخت العزيزة أميرة البدرى :

علشان تصدقى كلامى لما أقول لك

فيه عندك بذور ناقدة تحتاج إلى بعض القراءة فى هذا المجال لنربح ناقدة متميزة

أسلوب جميل فى الغوص داخل المفردات والإحساس وحالة المؤلف مع ربطها بالفكرة المعالجة

لإصدار رؤية نقدية ثاقبة

كأنك مع الشاعر وقت الكتابة تتابعينه وتكتبين رؤيتك أثناء كتابته للقصيدة

فى أقرب فرصة سأعيرك بعض كتب النقد

بس يرجعوا مش إنّا أسفأناكم

أخوكى جابر الزهيرى

الشاعر الأستاذ على ممدوح :

تعليق جميل وكلمات راقية ومجاملة رقيقة أشكركم عليها

دام تواصلنا

الزهيرى

غريبة ..
مع اني يا جابر كنت شايفك
ميت نبي
للشعر مرة وللغرام
والصورة مش فوق مكتبي

وكتاب ف قلبك ينقري
أيات كتيرة
وابتهال
ترانيم تحدد مذهبي


أزاي تسيبها تقتنع
بمسيلمه
وتقول عليك قصة
خيانة مؤلمة
هو انت فعلا خنتها
والا شيطان الشعر قلها تنتحر
عشان تكون في حضرتك
ميت ملهمة


أخي الحبيب الشاعر الكبير جابر الزهيري .. قصيدة كبيرة تحتاج لوقت كبير لتعيد قراءتها مرات ومرات لتجلي تلك اللحظة التي ولدت فيها .. والدافع الشعوري عندما انتزعت صورتها وقالت خلاص ملهاش لزمة كفرت بيك وما عدت أؤمن انك نبي الغرام المنتظر ..

أخي الكريم انت كبير في العامية كما انت كبير في الفصحي وهذا هو عهدنا نحن بالشعراء الكبار أمثالك
تقبل كل تقدير وأعجاب وأحترام

الشاعر المتميز حسام خليل :

ماينفعشى برضه دى إم العيال وعشرة سنين وشالت همى كتير

قبل ما تشيل صورتها والإنسان الأصيل يقابل المعروف بالمعروف

ومهما كان القديمة تحلى وعمرها ما كانت وحلة

ههههههههه

شاكك فى كلامك يا حسام

على العموم أنا عن نفسى الغرام كله منها وإليها فقط فهى ليست نصف الحياة

بل الحياة كلها

وإن كنت أناوشها فى أشعارى فهذا يدل على عشق يفوق قيس بن الملوح

الزهيرى

الشاعر الأستاذ أحمد موسى :

شكراً على هذا العرض الجميل للقصيدة

وإن كان يعتبر إطلالة تفسيرية لمفردات العمل

مرور جميل من شاعر جميل أعتز به

وإن كان هذا العرض يجعل المتلقى تحت تأثير هذا التفسير ويفهم النص على هذا الطرح فقط

فتتحدد الرؤية من خلاله

ولكن على العموم شكراً لاجتهادك

الزهيرى

الشاعر المتميز الاستاذ محمود جمعة :

دى خطة يا بنى رسمتها

ع الصورة أصلى أخدتها

منها وسكنت شنطتى

علشان تونس غربتى

وتكون معايا فى وحدتى

وقصيدتى كانت فيه الغرام

هى قالتها مش كلام

لكن بدمعات العيون

جابر ماعمرهشى يخون

أصله حبيبى ومطلبى

وللغرام أحسن نبى

أمنت بيه وأنا عيّلة

وهو كان ليه إمام سلام

مجرد مناوشة تمت بيننا لأربح قصيدة وصورة


ههههههههههههه

تعرف تعمل زيى

الزهيرى

الشاعرة المتميزة صاحبة الرأى السديد هنا بنت سعيد

تعليقكم وصل

وكان أشهى من العسل

قرأناه بدون كسل

وانتى أدرى باللى حصل

هههههههههههه

دخلتينى ليه ألف ليلة وليلة

وكأنى الوزير دهموش وزير دولة حلق حوش الذى يحاول طرد الوحوش عن الأميرة نور

العيون بنت الملك المأمون وعندئذ أدرك شهريار الصباح

كوكوكوكو ونكمل بكره

أخوكى الزهيرى

أستاذ جمال قصيدة راااائعة تثبتك فى المصاف الأول للشعراء الذين يطربون حين يسمعون ( من قبل الآخرين )...كسّرت فيّ كل إحساس بالأمان

بالإيمان

باللي كان

و نديت عليها و سيبتني

وسط الطوفان

اللي ف ثواني جه يغرّق مركبي

اعذرني

ما أنا قلبي الغبي

صدّق بإن مسيلمة

ممكن يصون عهد الوفا

لو قلبه داق طعم الهوى

ويكون نبي

صدقني و حياة الليالي اللي قضيتها

ف جنّتك

أنا عقلي من أول دقيقة

دخلت فيها دنيتك

قال لي ابعدي

كدّبت عقلي

و عشت ف الوهم الجميل

و أما انتبهت عرفت إنك

مش نبي



أستاذ جابر إيه روعة الكلمات والإحساس العالى دة كله ...سلمت ويسلم إبداعك

الشاعرة الأستاذة عزة الزرقاني

شكراً لمرورك الجميل و تثبت القصيدة التي أعتز بها

كل التقديرلكم و لتعليقكم

الزهيرى

الشاعرة سلوى محمود

شكراً للتعليق الراقي و المجاملة الرقيقة

الزهيرى

]b]الشاعرة الأستاذة بسمة الورد

القصيدة ليست أرق و لا أجمل من تعليقكم الراقي

لكم كل الشكر و التقدير

الزهيري[/b]