منا....فيهــا

أمانه عليك ماتدوس

يامشرط الجراح

أنا جرحي طيرملبوس

وماينفعوش إصلاح

لفيت بلاد الروم

وتعبت م التعليم

شيلاني م التقويم

كأني إبن سفاح

شوفواجمال ألتصويره

مصرالمعالم والسيره

بقيناعبره علي ألأيام

وبقينافرجه علي الجيره

وفيهاحكايات وقهاوي

وفيهاأدهم شرقاوي

وفيهاكورنيش وجناين

وفيها بدران الخاين

عامل مطاهر ومزين

وهوه يخربها مداين

وجوامع الله بيعينها

وفيها سونيا وزباينها

وفيها لازهر وأدانو

أحمد عرابي علي حصانو

وفيها سلطان بشنابو

سيدنا ألحسين وياصحابو

وفيها مسعور الكلبي

وفيها سليمان الحلبي

مش مصري لاكن م العيله

زنهارفي بابك يازويله

بيجدد الحلم المفقود

وينادي قللات الحيله

وفيها باب الشعريه

الترميات والحراميه

وفيها خلق بتتسلي

اللحمه فارت ع الحله

وبركه بتنام للدايه

وفيها بيت الحدايه

وفيها ثومه وأغانيها

قالت لناصرياحميها

عودت عيني علي الأفراح

الله يجازي إللي كافيها

وفيها محمود السامي

بارودي من سيفه الحامي

وفيها أنور ضلمها

ضرب البواني ف محاشمها

وماكتش ناقصه قانون العيب

وماكتش كافره وأسلمها

وفيها بيضه إللي فاقسها

ضرب الكراسي ف فوانيسها

وجاب ضرفها لحد الحيط

مصرالهزيمه وريسها

وفيها سوزي وفساتينها

وفيها كوره ومجانينها

حسن شحاته ولعيبه

كوبري اللمون والحبيبه

وفيها مصر الحدوته

بنوته ولدت بنوته

والقاضي بيقص ضوافره

والدم مسفوح ع التوته

وبورسعيد صبحت حره

ياريتها دامت { شر.... }

وسينا والسر ف بيرها

وفيها دم علي سريرها

رقابينا نخت من شيلو

وبعوها بجنيه الكيلو

وفيها طابا ومطباشا

ملوخيه خضره علي الباشا

والباشا فيها ومتولي

عمال بيفرد ويعللي

خان الخليلي إللي يخللي

الفيلم باين ع الشاشه

وفيها واحد أومباشا

علي أورطتين م البكاشا

بيحكمك الإنعاشا

لاكنه ميت من جمعه

والسيره علي قد السمعه

وفيها قعدات ومجالس

وفيها رضوان الحارس

علي كل لونك وقماشك

قادر يلبس أوباشك

ويعدي نيلك وقناطر

علي قبر سليمان الخاطر

وفيها واحد بسنانو

عمال يكز علي لسانو

ومعاويه غايب م الصوره

نايم سطيحه علي ودانو

تعلب ولف علي الحاره

لم البضاعه ف دكانو

وفيها مصر الحراميه

بتمد إيدها علي وليه

علي فرشه بتبيع البرسيم

تحرمها وتتاجر هيه

وفيها زعقه علي المنبر

وفيها قبر الإسكندر

بيعدي ع البحر المالح

برج الحمام لما يصالح

وفيها شيال ف المينا

وفيها رايا مع سكينه

( وفيها رايا وقلاضيشها )

( وفيها سيد درويشها )

وفيها فرجان من كربه

وفيها شاهد ع التربه

وفيها نسوان بتعدد

كل الجروح لما تمدد

وفيها فكر يشووشها

برنيطه زحمت طرابيشها

وفيها ناس ساكنه علي النيل

وفيها فقر يهد الحيل

وفيها بيرم وحبالو

مصر الجديده إللي ف بالو

عملوها واسعه وبحبوحه

علي قد واحد وعيالو

وفيها أحزاب وحكومه

مقصوص جناحها ومخرومه

المايه علي قد القله

والفرشه علي قد النومه

وسنانها متخشش فتحه

وفيالها من غير زلومه

وفيها جهل من الحاوي

بيهد بيت الطهطاوي

ويقيد جرايد طباله

مليانه ألوان وقواله

شي الله يا بدوي يا طنطاوي

سيدنا المسيح فك الكيسه

الرحمه قبل التوريثه

إرفع إيديك من بطن الناس

مكتوب في بابك يا كنيسه

وفيه مقطم علي طرفو

فيلات وناسها بيتظارفو

وفيها ناس تحتيه بكتير

غرقانه ف صابونه وصرفه

وياريتها دامت يام خليل

أهي عيشه أخرتها الترحيل

لاكن عشان الآخره تسوء

وقعت عليهم (طاخ) من فوق

حجاره كانت من سجيل

وجت حكومت إللي إتهدو

فتحو الورق لما إتغدو

وكان قرارهم حي سريع

الناس دي غلطت ف التطبيع

الناس دي مش بنيانها سليم

والحته مش داخله التنظيم

الناس دي لازمن يتمدو

والست فيفي وصحبتها

محبوسه هيه وعربتها

الليله لازمن هيعدو

إفتح طريق بدل المكسور

وكل ونش يحمل دور

وخلصونا لتتشدو

وفيها سلوي وفيها حسام

أخدم كفايه من الإسلام

يادوب توديهم طابا

عشان بيشقم وغلابه

وكله جايز ف الأفلام

وفيها نسوان بالسلي كون

تمنها بيعدي المليون

شي الله ياسيدي التليفزيون

وفيها نسوان حشيشه

تشيلها ولا خف الريشه

يتجوزوك من غير مأدون

وفيها نسوان شغيله

بيقضوا يومهم بالتيله

إردم عليهم بالنيله

صابرين وبيربوا عيالهم

بالدين ومرات بالحيله

وفيها لحمه وفيها كباب

وفيها مبروك الكداب

من كل دقنه بيفتلو

وبصاره يكتبها بتلو

ولكل آخر جي حساب

وفيها جامعه مع الطلاب

أخدم كفايه من التعليم

زي إللي دارس في الكتاب

يادوب يعلقها علي الحيط

أو كرسي يتشمس ع الباب

وفيها ناس بتربي دقون

ماهو كل شئ أصبح مدهون

يقول لك الله ورسوله

ويسرقك لو كنت زبون

وفيها ناس تعرف دينها

من غير ماتخلف موازينها

الكلمه صدق الكلمه حلال

ويصلي ولاحد يشوفه

ولالهش صوره ف حجر بلال

وفيهاخلق بتعريفه

وفيهاخلق بتوزن ماس

وهيه اعفن م الجيفه

وفيها ناس بتموت م الجوع

وهيه مش فاهمه الموضوع

الدنيا زحمه علي كتافهم

والضرب واصل في الممنوع

وفيها حرافيش ف الساقيه

تعرق وبردك مش لاقيه

وناس بتطلع م الأوبرا

وناس بتصرف بالفيزا

وناس بتنزل من شبرا

وناس بتشحت في الجيزه

يام العواجز يا عزيزه

بتصغري ف مصر الكبرا

وفيها طلق وفيها رصاص

وفيها درجات الإخلاص

وفيها ناس بتبص لفوق

مشتاق يامرسي يابوالعباس

وفيها عدس وفيها الفول

وفيها( سك.. )علي المحمول

وفيه معاهده مع الأعداء

وفيه مظاهره ف قلب بولاق

متجهه لميدان التحرير

هتعدي وتروح الوراق

وفيها دار قال للإفتاء

تاخد اوامر م الإشلاء

وفيه عساكر لابسه دروع

محوطه لازهر من إسبوع

وفيها ظباط من روما

نجحت وسقطت ف المجموع

وفيها علي قد مافيها

إياك تهوب نواحيها

علي قد إبليس وكلابو

هتلاقي صابر وصحابو

هما إللي حافظين حواريها

وإدعولها رب يزيح عنها

وإدعولها رب يخليها