دم فى بحر

الشمس بغروب بتتخفى ورا الجبال
وفلاحين م الغيط راجعه على الجمال
تشوف الكل مستنى يفك إحبال
وصوت ف الحارة بينادى يا خاله إقبال


ف صحن الدار وقاعدتها بقالها يومين
تخط الأرض قشتها ترف العين
دا حتى الراجل إتنكد سرح على فين
تشوف الخد متكرمش وقلب حزين


مايلة ع الأرض تتسند بكف الأيد
كمان رجليها تتخبط وقلب عنيد
بحور الدمع من عينها راحت لبعيد
دا أخر مرة كان صوته ف ليلة عيد


يا أغلى ماليه أزيك؟ وحشتك موت؟!
الليلة دية ها تعدى وبكره يفوت
أكون قدام خطاويكى أبوس الإيد
لسان الأم متكتف ما عاد ليه صوت

ردى عليه قوليلى أجيب لك إيه؟
قريت الفاتحة ف الكعبة ولجأت إليه
تكونى معايا وف مكة تحجى إليه
ما تردى عليه و تقولى جرالك إيه


وجبت الشبكة ويايا بيضتوا البيت؟
وإنا ف المينا دلوقتى وكمان عديت
وبعد الغربة و شقايا أنا لبيت
هاتوا المأذون مع فرقه يكون لها صيت


على عتبتها تتسند و حيط الجار
دا حتى الجارة عاتبتها ف ريح الدار
ما تتباركى و شدى الحيل يا خاله إقبال
دا ولدك جاى متهنى و معاه الأخبار


وقام راجلها بيدور ع الحتة الصوف
وحط الشال فوق العمه بلون مخطوف
مالك منهاره يا حرمة ماليكى الخوف
إدعيله ييجى لأحضانك زمانه ملهوف

و صورة ف جيبه طلعها شافتها العين
ونزلت دمعة ع الصورة بكل حنين
عينيه ف الساعة بتعد الثوانى سنين
وصل ع الشط و المينا فى بعد يا عين


يلاقى الخلق مرصوصة ع الصفين
بقالهم يوم و آدى التانى باقيله ساعتين
يخش ويسأله الكاتب دا جاى منين؟
على باخرة تمنيتها فوق التسعين


البرد قرص عليه ف ركن راح قاعد
و السهرة تحلى بدفا والناس بتتواعد
الليل دا جاب أخره رايح بيتباعد
يصبح علينا النهار والكل هايساعد


ف لحظة سكت الكون والكلام إنذار
والضحكة دبلت قوام ورموها وسط بحار
زلزال ودمر كيانهم والمكان إعصار
سرعان ما زاعوا الخبر ف نشرة الأخبار

ف بركة طين رمت جتتها تتقلب
قصت ضفاير لها وعلى صوتها تتغلب
تحزم هدومها بطين وف بطنها تسلب
تصرخ بأعلى الصوت ولدى وتتطلب


هناك ع المينا أبوه واقف و مستنى
يسأل رمال الشط قوليلى وين إبنى ؟
كلمنى ف ديك اليوم جاى لى هنا يبنى
معقول ف ليلة ويوم أجيله بيسبنى؟!


دمعه جرى على وش الميه يكويها
يحضنها موج البحر لإبنه يوديها
أتاريه غريق و جتته الدمعة ترويها
وأمه مين ف البلد يقدر يداويها ؟


من المينا للبلد كان الخبر واصل
شايفين دموع الأم والأب بيواصل
شافوا الكشوف مكتوبة و الجتت فاصل
وناس وليها أجل تتحكى بالحاصل

بعتت لأبوه تقوله قوم قوام راجع
تكون نسيت إسمه من كترة الفاجع
إكشف وجوه الجتت و إتملى مناظرهم
دا أنا أتشليت و جسمى ملان مواجع


حملتك أمانة يا أبوه إن جيت حدايا وحيد
من غير ضنايا أو جتتة إن كان دا أكيد
بمية البحر إتسبح وهات لى معاك
إن شاء الله حتى تغرفلى بكف الأيد

تشرفت بسماع هذه القصيدة الرائغة في نادي أدب منشية ناصر
أخي الشاعر المبدع الرائع علاء رزق
أحييك على هذا الإبداع
تقبل مروري وتحيتي وخالص مودتي

رائع ما قدمت شاعرنا\علاء رزق

سلمت الايادى والابداع الرائع

أحترامى أخى

أخى الشاعر الكبير علاء رزق :

دى قصيدة ولا دراما ولا سيناريو وحوار ولا أيه

لو قلت قصيدة شاعر عالى جداً

لوقلت دراما خط السرد والصراع وتناميه متواصل معك فى قصة رائعة

لو قلت سيناريو وحوار شايفك مقسم وصف المكان

سواء فى البيت أو الشاطئ والحوار بين الرجل وزوجته لتمكن شديد

أقول أيه

اللى أقدر أقوله ربنا يعكننك زى ما عكننتنى

أنا ما صدقت نسيت عبارة السلام

تفكرنى تانى

يا أخى روح وتعالى بسرعة

هههههههه

بجد يا علاء رائع فى كل شيئ

إنسان وأخ وصديق وشاعر وأنا وانت

ولا حد تالتنا

ما أنت عارف أنى بحب فريد

أخوك جابر

الشاعر الأستاذ علاء رزق
احييك على التصوير و الفكرة التى انطلقت منها القصيدة
و لا أدرى كيف يلقى شبابنا بانفسهم فى التهلكة
و يسافرون على متن المراكب غير الشرعية
و التى غالبا ما تنتهى بمأساة
لو كانوا قرأوا قصيدتك و عرفوا مدى الحزن الذى يشعر به الأهل
لما فعلوها

ناهيك عن تقصير الدولة فى التأكد من سلامة العبارات
و العدد القانونى الذى يسافر بها
و لكنها دولة بلا قانون

فيه حاجه غريبه بتتكلم

دايماً جواك

فيه ناس شقيانه بتتألم

وكتير تعباك

خلتني سرحت يا ولد هارون

بعدين وياك........

استاذ ومبدع وفيك حاجه عجيبه

يعرفها كل اللي قريب منك

اجملها علي الدوام قلبك مايشلش

ربنا يخليك لكل احبابك الكتير

اللي انا واحد منهم .... ابا سرحه

الاستاذ علاء رزق
ما اجمالك
ما اروعك
مع تمنياتى
لك بدوام التوفيق