اعتصام كوكب { صلاة سلاما }

بسم الله الرحمن الرحيم


اعتصام كوكب
*****
{ صلاة سلاما }
***




وكان ابن يعرب فى عز الهوان
وغرقان لشوشته لحد الودان
فى بحر الرذيلة وخيبته التقيلة
واذ بالمسيرة ترج المكان

مسيرة وفيها يا سادة النجوم
وفيها النسايم وفيها الغيوم
وفيها اللى يزحف مع اللى يعوم
وفيها تلاقوا يا عالم كمان

صخور الاراضى وموج البحور
وحوش البرارى حمايم صقور
ونادو يا ساده جميع الحضور
بدمعه ولمعه فى عين الايمان

بصرخه كبيرة بحرقه و دموع
بآهه مداها يشق الربوع
بتهتف حشودها بحب وخشوع
برغم اختلافهم فى طبع ولسان

بنأسف يا سيدنا يا طوق النجاه
يا تاج المحبه وروح الحياه
صلاة سلاما حبيب الآله
يا نظرة بارئنا بعين الحنان

وأول عبارة ف وسط الجموع
لشمس الثريا بثورة وسطوع
بزفره وحرقه ما بين الضاوع
تنادى يا طه يا حصن الامان

بأمرك نهارهم هيصبح شرار
وانشف بحارهم بصهد وبنار
وا دمدم جوارهم ولا خلى دار
مدام سبوا حضرة نبى الزمان

وقاطعتها نجمة بحير ة وسؤال
بدهشه ورعشه تفوق الخيال
مين اللى تجراء وسب الكمال
ياسين المفدا شفيع المدان

رؤوف الغلابه وحامى العقول
واكمل رسالة واعظم رسول
ملاحه وسماحه فصاحه وقبول
معطر مأرج بمسك وريحان

وجتها الاجابه كده من الصخور
وقالت فى آثم وراسم فجور
بأسم التحرر يسب الطهور
ويكفر ويفجر بفحش وجنان

ويكدب ما يكدب يزيف يجور
مسيره بكدبه وبزيفه يغور
ويفضل محمد شروق الدهور
مؤيد مسيد بكعبه وأدان

وبدر الليالى بلهفة وبشوق
برجفة ونفضة تهز العروق
بيمدح ويسرح فى وصف الصدوق
ويطلق لدمعه يا سادة العنان

يقول لجله اقسم عدوه العنود
واجرف غرورة بجذر ومدود
بقوة تزلزل فى اعتى السدود
وتخلع من الارض جند الشيطان

وبعده يا ساده يزيد الضجيج
وفضلت سباع البرارى تهيج
تقول يا نبينا يا عطر واريج
د يكفينا منك اشارة بنان

ونفتك بجاهل وسافل خؤن
وداعر مجاهر وطبعه المجون
نمزع اواصله فى حزم وسكون
ونغرز فى قلبه مخالب نيبان

وحتى النسايم وحتى الخيول
يقولوا لايمكن هيحصل قبول
ما بينا وبين ابن ادم جهول
يسب الحبيب الطبيب اللى كان

بيرأف ويعطف ولو ع الجماد
ويرحم صغار الطيور والولاد
وعاش كل عمره فى صبر وجهاد
وربه وهب له صنوف البيان

وكانت خلاصة جميع الاراء
يشنوا على الانس حرب وعداء
ويعصوا اوامر بنى الكبرياء
وقالوا جميعا كده بعنفوان

بأسم الخلايق ولجل الخلوق
ما ليك يا ابن ادم علينا حقوق
ومن بكره شمسك هتعصى الشروق
وتلقى الحمايم كأعتى الغيلان

وتلقى زهور الجناين سيوف
وتلقى المسره فى بعد وعزوف
وتفضل فى رهبه وتفضل فى خوف
من اكبر ما فينا لحد الديدان

لا ارضك هترضى تمدك بقوت
ولا راح تسيعك اذا يوم تموت
ولو بق ميه فى جوفك يفوت
هينزل كأنه سعير النيران

وعنها يا سادة فى و سط الوعيد
اذا بنور ف موكب يقرب يزيد
تحفه الملايكه بفرح ونشيد
تسبح تكبر بكل امتنان

ويحضر فى وسط الخلايق تمام
فى قلبه المكمل رفيع المقام
تجلى المحلى همس بالكلام
وطيب خاطرهم بطيبه اللى بان

وقال ان ربه ف كتابه الكريم
كفاه اللى يهزأ بقدره العظيم
لكنه لانه الرؤوف الرحيم
بيتمنى توبه لانس ولجان

وكفكف دموعهم بحلو الحديث
وفرق جموعهم بمنطق نفيس
ونمنا وصحينا نبرطع نهيص
لقينا الخلايق شقايق حسان

تأدى واجبها بصبر وحنين
كرامة لعهد اليتيم الامين
وتدعى بارئها يقدر يحين
بيوم القيامة وفصل الميزان

ولسه بن يعرب فى عز الهوان
وغرقان لشوشته لحد الودان
يذمه ف اصوله
يسبوا ف رسوله
يسبهم يقولوا
بكل امتهان




قال شيخ الاسلام بن تيميه
كنا اذا حاصرنا مصرا من الامصار وطال حصاره للشهر والشهرين يتسلل الى قلوبنا الملل لمنعته علينا ولكن اذا بداء الاعداء فى سب رسول الله صلى الله عليه وسلم
فكنا والله نستبشر بقرب الفتح على الرغم من كراهتنا لما نسمع
ليقيننا بأن من سب رسول الله مزق الله ملكه
ف صلى اللهم وسلم وبارك دائما وابدا على سيدنا محمد وعلى آله وصحبه اجمعين







تمت


محمود قطب