فضفض .....

إضحك عليا وقوللي مكبرتش !!؟

دوشتكم ؟
..
معلش
..
منا لسه باستكشف حضوري ف هذه المعمعه
محتاج لكم وياي ..أو .. ضدي تبقوا ومع
خط الحقيقة ف حالة إني كذوب
..
والحالة دي بتيجي
..
وقت المرايه ما تكشف الملعوب
..
وتقوللي صحي النوم
..
باصحي وبصحي المربكات ف النص
وبظبط المكياج حسب رؤياي
اللي انتهجت عشانها
دور الشك
ف حضور نواة الضي لما اتفك
من يد سلطاني
والياء ف أخر الكلمة للسلطان
مش ليا بالتأكيد
..
قوم تسألوا إن كنت قصدي سعيد
ولا اللي قاصده عتامة الصورة
..
خليكوا جمبي وزغزغوا الحواديت
وإن

انا كنت اكتر حد تشتاقله المقالب
ورغم سذاجة المقلب مبتعصبش
وبضحك ويا ضحكتهم
ومعرفتش أشيل ف القلب غير نبضه

خلصوا الملايكة وصفصوا الأوليا
والرايه دي اللي انتم

والعيشه أصلا في الأساس تسلية
حادفه الدموع في القلب للتحليه
والأرض سكنت ف العتامه عشان
خلصوا الملايكة وصفصفوا الأوليا

مانتاش طبيعي
والطبيعي تزك علي درب الحياه
يرمح وراك الحزن او ترمح وراه
مش مشكلة
الاشكاليه ف نصب هامات الجنون
وانت المطالب بالهدوء
..
والعقل
..
جاهل كإن الجهل معمول بالخصوص
علشان تبرر سترة الليل ع اللصوص
وانت اللي تايه بالوجع وسط النصوص

العمر طلقة وكل لحظة يقل
والصحبة صحبة ف حالة إنك ضل
مبقتش عارف تتسند علي ايه
والراحة لغز ومش لاقيها الحل

العمر طلقة وسرعته بتقل
والصحبة صحبة ف حالة إنك ضل
مبقتش عارف تتسند علي ايه
والراحة لغز بدون مواربة وحل
..

متدققش ف تخاريفي
ومتقفلش الباب
.
الشمس اليوم دا مجاتش
يمكن علشان متخانق انا والمجنونة بتاعتي
وضربنا الفرح ف مقتل
..
البيت استغرب م الفعل ومن رد الفعل
والشبابيك اتقفلت لاجل ما تمنع دوشتنا
تعدي الشارع
..
والبنانيت
..
مالهمش
..
هما الهامش والفحوى وكل ردود الفعل
والشك ف جدوى الفعل وعدم الفعل
...
تعرف لما تحاول تلقى مكانك وسط حروف الجر
مجرور علطول
إحساس مافيهوش إحساس معدول
وبرغم سذاجة هذا القول
ف انا لسه شبيه بالنكتة البايخة ف بحر

ولما زمان مدير الفصل كان يكتب ...
..
سكت الجميع ثم تكلم الحمار وقال
..
كنت بتهتف
(اللي يتكلم يبقى حمار)
ويضحك كل من سمعك
ووحدك تبقى مش عارف سبب للضحك والدوشة
فتستأذن خدودك حبة لاجل يبانوا م الضاحكين
..
فيحمّروا
..
سنين مروا ولسه عبيط
بروح مخدوشة م التخبيط
خططت وأخر التخطيط
بقيت تشبه حروف الجر
..

انا المحتاج مقولش بإني عايز

أرد الصفحة زي ماجاتنى بيضة

طويل الدرب والظاهر خدوشك
هتفضل ع الضيا والخير تحوشك
معدلتش دماغك
واستنادك
لحائط صد من اقدم ......جيوشك
....
هتغرق لسه ف بحار الندامة
وناوى تخلي لعتامتك علامه ؟
هتعقل يابن هذا السطر امتى
وميتى ف نيتك تترد خامة ؟!!
...

مغلوب وظاهر ف الصور - بالكدب- غالب

واللي محسكش بدون ما تقول
مش هيحسك مهما تبوح

الكراسة اتقطعت مني
وليه الحصة ما بتعديش
عم مشيل نسي جرس الفسحة
وأبلة سهام بدأت تفتيش
صف وتانى وقربت ليا
ضربت واحد كان قبليا
واما عنيها اتخبطت فيا
تهته قلبي وقال ...
ماتجيش
...
وقفت جمبي وشافت روحي
ماشية بترجف ع الكراسه
قلت ف بالي تعالوا خدوني
ولا هاتولي بدالكوا حراسه
ليه سايبيني لوحدي ف حصة
ماسكة ف ياقة خوفي الخاصة
كل ما أرص تبوظ الرصة
وترجع روحنا بخوف
متعاصه
قالت فين كراستك راحت
قلت إتقطعت غصب عني
ضحكت واما عنيها اتسعت
نطت كام عفريته ف سني
وقبل ما تبدأ ...
جرس الفسحة
قرر بعد النومة دي يصحي
قالت إوعي تصدق مزحة
انك قادر تهرب
مني
من وقتيها وروحي أساسا
ماشية بتعرج وسط السرب
كل جداول عمري إتقلبت
من حلاوتها
لجدول
ضرب

متغيرش البحر
بنفس البرد ونفس نسايم الفجر
اللي بتنخر ف العضم
ايه جد جديد !!؟
خلاك
تستني الشمس وتتكلفت بالبطاطين
..
مش كنت بتنزل بهدومك ف البحر
ف وقت الخنقة
ووقت ما يبقي البال مشغول
ولا كنت بتسأل
شتا أو صيف
كنت بتنزل علطول
..
وبتغطس
تزعقلك زعقة
ياخدها البحر ف روحه
..
تخف
..
دلوقت بقيت بتلف
كيف عباد الشمس علي الدفيان والضي
شكلك عجزت يا خي
..
وبقيت
..
ولا ألظاهر كده
..
مبقتش