الله الدايم هو الدايم
ولا دايم غير الله ..

عروا الميت من توبه
وافرشوا ف الشمس عيوبه
القدس حترجع لما ...
نمسح م الدنيا ذنوبه

الله الدايم هو الدايم
ولا دايم غير الله ..

مات المرحوم م الخضة
بيتوا جتته ف الردة
كاتب ع الكعبه اغاني
والقدس عاملها مخدة

الله الدايم هو الدايم
ولا دايم غير الله ..

غسلوا جتته بكولونيا
المرحوم من ساكسونيا
العربي دة دقة قديمة
والقدس بقت ف بولونيا

الله الدايم هو الدايم
ولا دايم غير الله ..

كان صاحب خطة بديلة
يخطب ليفي لعديلة
ويجوز جيمس حماته
والقدس حبالها طويلة

الله الدايم هو الدايم
ولا دايم غير الله ..

ضيقوا للميت نعشه
حطوه مقلوب علي وشه
كذاب والقدس دليلي  
دة حرامي سرق من عشه

الله الدايم هو الدايم
ولا دايم غير الله ..

قال أيه واقف زنهار
والقدس عاملها شعار
يشحت من ناسه بطولة
ويقيد ف القدس النار  

الله الدايم هو الدايم
ولا دايم غير الله ..

أدعو ف جنازته عليه
يتعلق من رجليه
والقدس تصلي وتدعي
مالك يحرقه بإيديه

الله الدايم هو الدايم
ولا دايم غير الله ..