قصيدة مجرد اقتراح- سيدة فاروق

مجرد اقتراح
تقدر تمسك بلطة وتروح شاقق نفسك نصين بالطول؟
من عند بداية الجمجمة لغاية بين الرجلين
وسيب كل شيء ينكب على الأرض
سيب العفونة اللي بيقولو عليها الحب الأول
وشوفه كويس وشم ريحة الكلام الجميل لما عطن من كتر الركنه
كمان اقطع الحته اللي فيها حبيبك الاولانى
حددها وسيبها تقع ع الأرض
ونفض من ودنك أغنية ضميني وانسى الدنيا
هتقع منك زي الدم الفسدان
كمان اخلع جلد اديك زي الجوانتى
هتنقط أول لمسه حب
وهتلاقى ايدك من سلامات الناس اللي ما كنتش عايز تسلم عليهم خالص
وسلمت
اتحول جلد ايدك لحاجه كده زي جلد الخرتيت المليان بالدود
سيبكمان الحته اللي فيها النظرات المتغمسه بالشهوة لجسدك
سيبهم يتكبو على الأرض
عفونة
وسيب الحته الكبيرة من مخك تقع لوحدها قدام عنيك
الحتة المركب
اللي كنت ناوى تجمع فيها كل أصحابك وأحبابك
وتطير
لبلد تانى
مافيهاش
أمريكا
ولا إسرائيل
ولا حتى آي ظلم من أي حد
سيب الحته دى بالذات تقع قدام عنيك
وطلع كمان من ودانك أغنية موال النهار
واحلف بسماها وبترابها
وماتقولشى آيه ادتنا مصر؟
نفض كمان الحته اللي بيقولو إنها أصحابك
اللي ف أول ملف
راحو حد فينك
ودايسين بنزين ع الآخر
الحته دى برضه ممكن تلاقيها لسه دافيه
بس من كتر العفونة
كمان سيب الحته اللي فيها طفلك الرقيق
سيبها تقع ع الأرض
لانك وبصراحة
لاضامن بكرة لطفلك
ولا ضامن طفلك بكرة هيبيعك لمين وبكام
وهيبيع الأرض دى هي بايه ولمين
والأرض اللي بتتكلم عربي مانتش عارف بكرة هتغنى بايه
نفض من ودانك أغنية سيد الحبايب يل ضنايا أنت
وامسح نقطة الميه الدافية اللي نزلت من عنيك دلوقت
ارجع نفض من ودنك التانيه أغنية اشيلك يا ضنايا شيل واعدي بك بحور الويل
كداب
هيطلع كل ده من ودنك زي الدقيق المسوس
كب كل ده على الأرض
وطبعا الأرض مش هتشرب أي شيء من اللي وقع من دماغك
ولا حتى الدود هتطاوعه نفسه ويقرب من جسمك
هتودى كل ده فين
عشان كده عندك إحساس دايم بانك جسمك عمال يترج
حتى وانت واقف عمال يترج يترجرج
مابقاش متحمل
كم العفونة والسوس والتعطين والتسرطين اللي جواه
سيب جسمك تاكله الأرض
أو ياكل هوه الأرض
أو يغور هوه مع الأرض
ورجعنا تااااااااااااانى
لسهراية الأرض
وناس الأرض
ودود الأرض
أقولك
م الأول
هات بلطه وابدا بالشق
نصيييين 00من عند الجمجمة بالظبط00

شكرا
مساؤك ورد
قصيدة جميلة

هاتي دبوس واخرمي عينيكي هيقع منها كل الناس اللي انتي شوفتيهم
واخرمي ودانك هيقع منها كل الكلام الجميل اللي انتي اكتشفتي بعدين انه كذب
واغرسيه فى قلبك مش هيقع منه حاجة لان كل اللي حبتيهم مش هتنسيهم حتى لو اكتشفتي خداعهم لان الحب اجمل ما فى الحياة يمكن ان يجرحنا ولكن حتي الجرح له طعم خاص فى الذاكرة يشكل اعمارنا واهم ما فى الماضي انه اصبح ماضي .
عزيزتي لا تحتاجي لبلطة لتنتزعي ما بداخلك كل ما هو قبيح دعيه داخلك لانه يوما سيصنع منكي اجمل ما فى الحياة .
تقبلي مروري واعجابي بفكرتك
وعدم اعجابي بتشاؤمك

دام التألق شاعرتنا المميزة
ما شاء الله